الشاعر احمد فؤاد نجم ...اخر الصعاليك المحترمين ... رائعته كلب الست

فى الزمالك من سنين
وف حما النيل القديم
قصر من عصر اليمن
ملك واحدة من الحريم
صيتها اكتر م الادان
يسمعو ه المسلمين
والتنتر والتركمان
والهنود والمنبوزين
ست فاقت الاحترام
صيت وشهرة وتل مال
يعنى غايه التمام
قصرة يعنى هة كلمه
ليها كلمه فى الحكومه
بس ربك لجل حكمه
قام حرمها م الامومه
والامومه طبع ثابت
جوه حوا من زمان
تعمل ايه الست جابت
فوكس رومى وله ودان
فوكس دة عقبال املتك
عندة دسته خدامين
يعنى مش موجود فى علتك
شخص زيه يا اسماعين
واسماعين دة يبقى واحد
م الجماعه التعبانين
اللى داخو فى المعاهد
والمدارس من سنين
حب يعمل واد فكاكه
يمشى حبه فى الزمالك
والقيامه والفتاكه
يرمو طبعا ع المهالك
عم من قيامته
حب يعمل فيها فله
بعد ما الوظ بجامته
اشترى حته مجله
قول مشى يقرا فى حكايه
من حكايات الغرام
واندماجه فى القرايه
خلا مشيه مش تمام
ع اليمين يحدف بعيد
خطوتين ويروح شمال
لمحه فوكس من الحديد
قال دا صيد سهل حلال
هب نط فى كرشه دوغرى
جاب بيجامته لحد ديلها
قال يا رجلى
رجلى مالها ؟؟
بص شاف الدم سايح
من عاليها ومن واطيها
ويالى رايح
ويالى جاى
المجله مش لاقيها
حبه واتلمو الظنايا
اللى هما البوابين
والحكايه والروايه
قال لهم دا كلب مين ؟؟؟
كلب مين!!!
ما كلب مينشى
سمعه لبخ حبتين
قال واحد منهم
امشى
اللى جابك عنده مين؟؟
قال دا شارع يا مواشى
والجميع بيمر فيه
اللى راكب
واللى ماشى
مستحيل نستغنى عنه
كلمه من دا
وكلمه من دا
ظاطو واترسمت فضيحه
قول نهايته
القصد من دا
اسما عين اكل الطريحه
راحو قسم الشرطه طبعا
والنيابهكفيله بيهم
واترمو فى الحجز جمعا
لما يجى الدور عليهم
حبه والشاويش امين
قال: سعيد النقشبندى
قام غريم عم اسما عين
قال له:
محسوبك يا افندى
قام سى سمعه
يروح معاه
الشاويش قال :
غور بدمك
راح تعوصنى
فوق قفاه
كف طرقع
داهيه ف امك
تفتكر يفضل سى سمعه
قد ايه فى القسم نايم؟
استضافه الحجز جمعه
يا بلاش
ادى العزايم
شاف بلاوى ما تتحكيش
م الديابه المسجونين
قال يا عم يا شويش
يا نيابه يا مسئولين
خلصوه بعد المناهده
جثه من جحر الديابه
هى يمكن ساعه واحده
كان فى مكتب النيابه
قاله مالك يا اسماعين
قال له زى البمب ...مالى؟؟
قاله عضك فوكس مين
قال له سبنى اروح لحالى
انت شوف سى فوكس يمكن
خد تسمم ...غصب عنى
الوكيل قال برضه يمكن
والشاويش قعد يغنى
انت فين والكلب فين
انت قدة يا اسماعين
طب دة كلب الست يا ابنى
وانت تطلع ابن مين
بشرى لصحاب الديول
واللى له اربع رجول
بشرى لسيادنا البهايم
من جمايس او عجول
اللى صاحبه يا جماعه
له غناوى فى الاذاعه
راح يدوس فوق الغلابه
والنيابه .....بالبتاعه